معاك موبيل من كااااام سنة؟
السلام عليكم ورحمة الله وبركاته
هذا الموضوع بتاريخ : 15/2/2008
الموضوع بيتحدث في موضوعات كثيرة منها الموبيل وليس التركيز كله على الموبيل بل الموبيل جزء من اجزاء كثيرة ونقاط مطروحة في الموضوع
انت معاك موبيل من كام سنة؟؟ وانتي معاكي موبيل من كااام سنة؟؟
اللي حيجاوب حيقول من وانا في الجامعة , وفي حيقول من وانا في ثانوي وفي حيقول من سنة واحده وفي حيقول من شهور
طيب الموبيل مع الناس دي بفايده؟؟
الناس اللي في الجامعة محتاجينه عشان هما معظم الوقت خارج المنزل وبيحتاجوه في حجات كثيرة منها دراستهم ويتصلوا بزمايلهم ويعرفوا اخبار اهلهم , واللي في ثانوي عشان في دروس وفي تأخير برة البيت , والمواصلات الزحمة بتخللي الاهل دايما عازين يتطمنوا على اولادهم , وطبعا اي واحد بيشتغل الموبيل بقى مهم بنسبة 90 % من شغله ولو اتسرق او ضايع بيقول انا انتهيت ارقام الناس اللي بشتغل معاهم على الموبيل , لحد كده ميه ميه والموبيل مفيد جدا بنسبة 100 %
نيجي بقى للناس اللي بيستخدموا الموبيل نص نص؟
يعني ايه نص نص؟؟؟؟
يعني حبه للضروريات وحبه للمعاكسات او للمضايقات او لتضيع الوقت او للاشتغالات او لتصوير البنات او لسماع الاغنيات او لفضايح البنات او للتشهير او لعرض الكليبات الاباحية وغيرها من الكليبات التي تعرض على الفضائحيات
طيب دوول ربنا يهديهم ويستخدموا الموبيل في طاعة ربنا كله يعني في المباحات كلها من صلة رحم لاهتمام بالاهل لانجاز شغل وغيره من المباحات
لان دووول بالغين ويعرفوا الحلال من الحرام واحنا اتكلمنا عليهم في الموضوع اللي فات
http://wenda.jeeran.com/topic-3.htm
نرجع بقى ونركز على الاطفال اللي بيشيلوا موبيل
ازاااي ك اب تجيب موبيل لابنك او بنتك وهما لسه في ابتدائي ؟؟؟؟
انت بالموبيل ده اولا بتشغله عن دراسته , وعن احلامه البريئة اللي هي كل حياته
احلام الاطفال ايه هي ؟؟؟
انه يقول انا عايز اطلع ظابط او رياضي او دكتور او دكتورة , الاحلام دي لو ساعدنا اولادنا وارشدناهم حتكبر وحتبقى كل هدفه لما يكبر انه ينفذ الاحلام دي طبعا كله بتوفيق ربنا , يعني انت دورك ك رب اسرة انت تعلم اولادك انهم يكونوا اصحاب اهداف واحلام وتعرفهم ان الاحلام دي حتتحقق ب عدة اشياء , اولا طاعة ربنا لان الله سبحانه وتعالى هو القادر على كل شئ ولا يعجزه شئ , ثانيا بذل الجهد والتعب والمجهود لكي يصل للهدف , ثالثا مكافئة خاصة جدا منك لانه حقق وتعب ووصل لهدفه
اضرار الموبيل على اطفال ابتدائي واعدادي؟؟؟
- انخفاض ملحوظ في مستواه التعليمي بشكل ملحوظ
- جلب المشاكل للاهل لان الاطفال لا يميزون بين الخطأ والصواب بصورة كاملة
- الوقوع في الاخطاء الفادحة مثل الحب المحرم بين شاب وبين فتاه عمر الشاب 20 وعمر الفتاه 13 او 14 عام
- البنات اكثر الضحايا لانهم لا يجدون الحب داخل محتوى الاسرة ولا يجدوا الاحتواء ولا يجدوا من يشاركهم افكارهم واحلامهم فيبحثون عن الصداقة والحب خارج المنزل
- الموبيل قد يكون مكافئة جيدة للولد والبنت ولكن بعد اجتياز مرحلة معينة من التفوق والنجاح في دراسته , وتشترط على ابنك وبنتك ان الموبيل حيكون تحت نظرك وحتعرف كل جديد , آآآآه هو اسلوب فيه حبه رعب بس حيجيب نتيجة مع الجيل بتاعنا ده وزمانا ده , الولد والبنت ساعتها مش حيفكروا يزعلوا ابوهم ويحعملوا حساب لربنا قبل كل شئ عشان انت ك اب زرعت فيهم حب ربنا بالطريقة دي والخوف منه والعمل على طاعته , فمستحيل حيحصل منهم خطأ لو كنت زرعت كويس , وعرفهم دايما انك بتحبهم , والوقت المناسب في مرحلة ثانوي وتعرفهم ان الموبيل حيكون بين ايديك في اي ثانية كإنه بتاعك تتفحصه وتشوف الرسائل ومع الوقت حيتولد ثقة ومش حتحتاج تعمل كده تاني لانك خلاص واثق في ابنك وبنتك
اغلب الاطفال دوول مش محتاجين موبيل ؟؟؟
- اولا انت عمرك ما حتسيب ابنك او بنتك الصغيرين دوول يخرجوا لوحدهم ابدا , واي مكان يا بتبقى معاهم او مامتهم معاهم او احد الاقارب اللي اكيد معاه موبيل ومنه تتطمن على اولادك
- الموبيل نقمة اذا استخدمه الاطفال في المعاكسات وفي الحب المحرم وكم من فتاه في سن المراهقة , يتلعب بيها الكرة وآل ايه في واحد بيحبها
طيب اسئل بنت 14 و 15 لحد بنت 19 ؟؟؟
- اللي بيقول انه بيحبك ده جه اتقدملك؟؟؟ حتقول لسه بيدرس او لسه بيكون نفسه او واعدني انه حيتقدملي بعد 4 سنين
طيب السنين دي مش ضايعة من عمرك هدر ؟؟ وفي السنين دي انتي بتعصي ربنا ؟؟ وفي السنين دي انتي بتخصري اكثر ما بتكسبي !!!
فكري شوية الشاب عايز ايه من البنت في سنك؟؟؟
- عايز ياخد وقت حاسس انه حيكون لذيذ , فيقول انا عايز اعرف البنت دي , جميلة و كل اصحابي حيقولوا عليا راجل جامد وشاب روش اني وقعت اللي ماحدش قادر يوقعها او كل اصحابي حيحسدوني اني عرفت بنت زي القمر , او حتفاخر قصاد بنت تانية اني معايا بنت اجمل منها واسيب الاولانيه وادور على واحده تانية عشان لما يحب يسيبك "يقلبك " ويجيب غيرك وهكذا
- عايز يمارس حاجة حرام معاكي زي انه " يبوسك - يحضنك " او يفضحك او يخللكي زله تحت امره , او عايز يغتصبك
- غريب جدا اللي بنسمعه عن السينيمات مش بس الولد والبنت بيبقوا في خلوه مع بعض ؟؟ , لأ كما لما يكون في زحمة في خروجهم او دخولهم السنيما بيكون الولد لازق في البنت , والولد ده اللي من حقة يلزق اللزقة دي " تحرش مشروع " يعني , والتحرشات الآخرة ممنوعة بالثلث , والولد لو مسك ايديها او لمسها او هزر معاها بإيده على اي جزء من جسمها حلال مش حرام والبنت مش بتزعل ولا بتتضايق ولا بتعترض , والولد لما يسيبها بعد فترة وهو اسمه الحب تقول عليه ده خاين , او تقول عليه ده سابني باحترام
عايز اسئل كل بنت شوية اسئلة؟؟؟
- هل انتي شايفه ان في حاجة اسمها حب بدون جواز؟؟؟ لو قولتي آآآه يبقى انتي واخده ثقافتك من الافلام والمسلسلات والمجلات والانترنت , وتحتاجي اني حد ينصحك
مافيش حاجة اسمها حب بين واحدة و واحد الا في النور وبالأخص بعد كتب الكتاب
- معظم الشباب اللي بيعرف بنت عن طريق النت او الموبيل او في اي مكان وبيخرج معاهم وبتتساهل معاه في الخروج او بتخلليه اقل حاجة يمسك ايدها , الشاب ده لما يفكر يرتبط مش بيفكر فيها , وبيقول انا ارتبط بواحده سهلة ليه؟؟ لو كانت محترمه ماكانتش وافقت انها تخرج معايا او تخليني امسك ايديها , او تخليني اتكلم معاها في التليفون ونقول كلام زي اللي قولناه
زي ما البنت غلطانة انها بتتساهل في التعرف على الشاب وموافقة على طلباته من خروج و فسح وغيره , الولد كمان غلطان عشان بيفرط في حقوق ربنا وفي حقوق الناس وبيخون الامانة والبنت كمااااان بتخون الأمانة
طيب والحل بسيط جدا جداًً
الحل في رسائل للجميع .....
للاب : انت قائد المنزل تستطيع ان تربي انت وزوجتك الشباب والبنات على الاخلاق وطاعة الله وعلى غض البصر وعدم الخضوع بالقول وعدم انتهاك حرمات الله , تعلموهم باسلوب بسيط يحببهم في الدين , لان الدين يسر , بس مين اللي يوصل الدين ويحبب الناس في الدين , انت ممكن تكون بتكلم ولادك في الدين صح وكل حاجة بس متشدد بتكرهم في الدين , مع ان الدين اللي يعرفوا صح حيحبوا وحيطبقوا عشان وارء هذا الحب وهذا التطبيق رضا الله والفوز في الدنيا والأخرة
للام : لابد ان تكوني صديقة مخلصة لبنتك وابنك , خللي الثقة مابنكم وازرعي في اولادك الصدق وكوني مثلا لهم في الصدق , والصدق يولد الثقة والثقة هي اساس الحب والحب يولد مزيد من الحب والعمل من اجل اسعاد الحبيب , ولازم تعلميهم انهم يحبوا ربنا وتعلمي بنتك ان الحب مابين البنت واخوها والبنت وابوها والبنت وامها والاخ واخته هو ده الحب اللي لازم يكون جوه القلب هو وحب الوطن وحب العمل وحب كل شئ احله الله , وفوق كل ده حب الله ورسوله صلى الله عليه وسلم , وتعلميها ان الحب بين اتنين ولد وبنت
نوعين : النوع الاول هو الحب اللي بيحصل بدون تدخل من الطرفين , يعني مثلا ناس معرفة بيحكوا قصاد البنت عن شاب خلوق و جميل في الطبع والتدين فتتولد مشاعر تلقائية بدون تدخل او العكس يحكوا للشاب عن فتاه جيده تصلح للارتباط , وهذا الحب مباح ولكن من يقع في هذا الحب عليه كتمانه الي ان يشاء الله ويتقدم هذا الشاب الي هذه الفتاه وتكتمل الفرحة بعد كتب الكتاب وهنا من حقهم ان يظهروا هذا الحب
النوع الثاني : هو الحب المحرم اللي بيحصل من تدخل الطرفين , يعني بالنظر زي واحد شاف واحده عاجبته وفضل مبحلق فيها لحد ما عجبته وغريوته ونفسه الضعيفة وشيطانه بيساعدوه انه يكمل في الحب ده وانه يتجرأ ويكلم البنت بدل مايبقى الحب شفوي وبس , لأ يبقى شفوي وتحريري , وكذلك عن طريق الانترنت والموبيلات تنشأ علاقات محرمة عن طريق الميوعة في الكلام و التأثير على الطرف الاخر باحد المؤثرات من كلام تتلذذ به المراهقات نظرا لعدم علمها الكافي بخطورة الوقوع في مثل هذا الحب الذي قد تخصر فيه ويتمادى هذا الحب المحرم الى ان يصل الي زواج عرفي او اغتصاب باسم الحب او غير ذلك من المحرمات التي تحدث بين الشباب والبنات الذين لايعرفون اساس وتعاليم دينهم , وهذا حب لايدوم وهو حب وهمي وقصص يفتعلها الطرفين ويصدقوا ان هذا حب وهذا ليس بحب بل هو معصية لله وانتهاك للامانات وفضائح وعار للبنات
للشاب : اتقي الله في بنات المسلمين وغيرهم من البنات , البنت دي ممكن تكون في يوم من الايام مراتك وقبل ما تكون مراتك ترضا انك تعرف انها كانت على علاقة بشاب قبلك وحصل مابينهم حاجة زي " البوس والاحضان والمعاشرة " "زنا",, اكيد طبعا ماترضاش وماتوافقش على ده , ولو عرفت ان البنت دي كان ليها علاقة قبلك حترفضها , طيب يعني انت مثلا ملاك واي بنت وقعت في المعصية دي شيطانة؟؟؟ كل واحد بيغلط قي حق نفسه وحق الناس غلطان ولازم يستغفر ربنا عشان ربنا يتوب عليه ويوفقه باقي عمره , انت غلطان ولازم تتوب عشان غلطت زمان مع واحده , ولازم تستغفر ربنا وتوب بجد عشان ربنا يرزقك ببنت الحلال اللي تسعد قلبك وتسعد اوقاتك وتكون حاسس انك عايش في جنة في الدنيا لانك بتطيع ربنا , ومهما كانت المشاكل من غلاء وغيره ربنا حيقدرك عليها وحتحس ان زوجتك واقفة جنبك ومهونة عليك وانت كمان واصلها نفس الاحساس , وصدقني الحب ده هو اللي بيعيش الحب اللي ربنا راضي عنه يعني الحب اللي مابين راجل وزوجته
للبنت : اتقي الله حتى يكون الله بجانبك , انتي اللي بتفتحي السكة للشاب , وانتي اللي ممكن تصلحي حال الامه كلها , انتي اذا كنتي مش محجبة فإنتي بتفتحي سكة للشاب انه يعاكسك وانه يتفتن بيكي وانه يقرب منك ويتحرش بيكي ويحاول يعمل معاكي علاقة صداقة , مافيش صداقة في الاسلام مابين رجل وامرأة , وصديقك هو ابوكي واخوكي وعمك وخالك وجدك غير كده يبقى جوزك لما ربنا سبحانه وتعالى يكتبلك الزواج ان شاء الله , وانتي لو محجبة حجاب شرعي صحيح حتخللي الشباب كله ينصلح حاله لان الشيطان نفسه مش حيلاقي للشاب ده سكه انه يعصي ربنا على الاقل في الشارع لان البيوت فيها النت والدش وغيره بس انتي اعملي اللي عليكي وارضي ربنا جوه البيت وبره البيت , ماتسماحيش لاي شاب انه يكلمك على النت او الموبيل او في الشارع , ماتتفرجيش لى حاجة تغضب ربنا وتزينلك الحب في عينيكي عشان ماتقعيش في الغلط او في حاجة تندمي عليها طول عمرك
رسالة للجميع
قال تعالى " ومن يتقي الله يجعل له مخرجا "
بصراحة كلنا بنساهم في تدهور الحال مع اولادنا وبناتنا ومجتماعنا كله
الاب مش عارف ان بنته الصغيره اللي معاها موبيل ممكن تستخدمه غلط , وتستخدمه غلط ليه ؟؟؟ عشان انت ك اب ماعلمتش الصح من الغلط ما كنتش حكيم مع اولادك
الام اللي بتسمح لبنتها انها تخرج من البيت بملابس ضيقه وطرحة على انها حجاب غلطانه وبتساهم ان بنتها ترجعلها في يوم متعاكسه او حد يتحرش بيها او حد يغتصبها
لازم نعرف ان الموبيلات والاختراعات الحديثة كلها ابتلاء من ربنا وبيختبرنا فيها ويشوف حنستعمله ازاي ؟؟ في طاعته ولا معصيته
الاطفال اللي بيتشيل موبيل بيشلوه عشان يشيلوا عليه نغمات واغاني وفيديو كليبات خليعه او غيرها مباح او غير مباح , ونلاقي الاطفال دول معاهم موبيل وحاطين عليه كود امني يعني لازم اللي يفتح الموبيل لازم يكون معاه الكود او الباس ورد عشان يدخل على الانظمة والملفات يبقى بالعقل شايلين ايه؟؟؟ وانا سمعت عن اطفال بيشليوا بلاوي على موبيلاتهم و الكمبيوتر
الاهل لازم يعلموا اولادهم الصح من الغلط والحلال والحرام
الاب هو اللي بيجيب في البيت الدش والديكودر والموبيل وغيره ولازم يكون قدوة يتفرج على القنوات الاسلامية والمباحة ويعلم اولاده ده ويعلموهم الصح من الغلط وازاي استخدام الموبيل يكون في رضا ربنا وازي يكون في معصية ربنا وتحذرهم وتاخد بايدهم وتصاحبهم وتحبهم واللهي لو حصل ده اكيد الحال حيتغير للاحسن
في النهاية واكيد الكلام ماخلصش لاني بشر واكيد كلامي ناقص بس اهي محاولة وربنا قادر ان ناس اكثر يطلعوا يبيبنوا للناس الصح من الغلط وينصحوهم وممكن يطورا فكرة الموضوع ده
اللهم اغفر للمسلمين والمسلمات ,وصلي وبارك يا الله على سيدنا محمد صلى الله عليه وسلم
*************************